يوم بحلقة في معرض الكتب المستعملة

   كريم الشيخ ، ناهد سمير ، إيمان زين ، أحمد الساعاتى ، مروة إبراهيم
   أحمد هندى ، أحمد دبور ، نانسي ممدوح،

  هما دول زملائى و أصدقائي المبحلقين اللى ساعدونى في عمل  أول
 فعاليه تشارك فيها بحلقة على أرض الواقع فرغم إننا مجلة إلكترونية
 تقوم بأغلب أعمالها فى العالم الإفتراضى "الانترنت" الا اننا كل موضوعاتنا
 عبارة عن بحلقه على الواقع المصرى و بالتالى كنا عايزيين نشوف بعد أكتر
من 3 شهور من انطلاقة المجلة مين عارفنا و مين ميعرفناش و اللى يعرفنا رأيه إيه فينا ؟
و إيه اللي الشباب عايزين يشوفوه علي بحلقه؟

س: طب أزاى؟
ج : شاركنا في معرض الكتب المستعمله.

كانت فكرة طرقعت فى دماغى و أنا باشوف دعوات الevents  على صفحة
 الfacebook  الخاصة بى فمن بين الدعوات كانت الدعوة لمعرض الكتب المستعملة
فى المركز الدولى للتنمية الثقافي بالدقى و في اخر الدعوة كانت هناك ملاحظة
ان الفرصة ما زالت متاحة للمشاركة في المعرض ،،، فقلت لنفسي ايه المانع
اننا كمجلة نشارك في المعرض ، إحنا حوالى 30 محرر لو 15 منهم اتبرعوا ب 5
كتب مستعمله نقدر نشارك في المعرض و نستغل الفرصة بالتواصل مع جمهورنا
و كانت اول خطوه هي سؤال المسئولين عن المركز اذا كان من الممكن ان نشارك كمجلة
في معرض الكتب المستعمله و كانت الإجابه ترحيب كبير عبرت به الكاتبه مي بهاء و هى منسقة
المعرض بالمركز و كانت الخطوة التاليه الإتصال بزملائى واحداً تلو الاخر - أتكلفت حوالى 50 جنية كروت شحن-
علشان أقولهم الفكره أغلب الزملاء فرحوا و تحمسوا للفكرة و إنهالت الافكار و المبادرات ليوم المعرض

و قسمنا الشغل ...و بدء العمل

-طباعة لوحات ملصقات.
-عمل قائمة تواصل لجمع البريد الاليكترونى لزوار المعرض للتواصل معهم.
-تصميم استطلاع رأى حول المجله لمعرفه ردود فعل الناس إتجاه المجلة .
- طباعة نماذج من الموضوعات المنشورة في المجله لاطلاع الزوار عليها.
- تحميل الموقع علي لاب توب لتعريف جمهور المعرض بالموقع .
- و طبعا التبرع بالكتب و جمعها و تصنيفها .
- الوجود يوم المعرض للتنظيم و تعريف الجمهور بالمجلة.

كل الحــــــاجات دى محدش عملها لوحده روح الجماعة كانت مسيطرة علينا و كمان
روح حب مصر و البحلقه عليها من خلال مشروع صحفى شاب و طموح.

اليوم و اللي أتعمل فيه  (:

كان اليوم ممتعا للغاية تجربة جديده ، اولا التعامل مع الجمهور بشكل مباشر و
ممارسة صحفيين شباب لبيع الكتب يعنى  مش عارف إذا كانت حصلت قبل كده
ولا  دى أول مره ، طبعا إحنا هدفنا مكنش تجارى بالمره و لكن التواصل مع الجمهور
و الإجابه على السؤال قد ايه من الشباب يعرفونا ؟
و كانت الإجابه مفاجأة فمن بين 30 أستبيان كان هناك 13 يقولون أنهم يعرفون المجلة
و أطلعوا عليها و تباينت الاراء حول المجله في الاستبيانات و على ضوء وجهات نظر
القراء هنحاول نطور نفسنا ان شاء الله ،،،، مهم جدا انى أقول ان الاستبيان تحت
شعار "رأيك بيطورنا " كانت فكرة زميلنا المبدع أحمد دبور .

اول 5 توقيعات فى دفتر أوتوجرافات بحلقة

من الحاجات الجميله اللى حصلت في يوم المعرض اننا قدرنا نجمع توقيعات
فى دفتر أوتوجرافات بحلقة و كان أول من وقع عليها هو المدون و الكاتب الشاب
ابراهيم عادل صاحب مدونة انا و انا  و كتبلنا " ابقو خلونا نكتب معاكو"
 و طبعا ابراهيم عارف انه مش محتاج عزومه
و تانى توقيع كان عبارة عن رسمه للفنان الشاب محمد تهامى
و ثالث توقيع كان للفنان مأمون المليجى و رغم ان القلم كان بيقطع كتبلنا
" مع أطيب التمنيات بالتقدم و النجاح
رابع توقيع كان للفنانه منحه زيتون اللى كانت معجبه جدا بالمجله و خصوصا
لما كنت بعرفها علي الموقع و قلت ان احنا عندنا قسم الأخبار اسمه
جاءنا البيان التالى قالت لى انا مثلت في الفيلم ده (:
و علشان كده كان توقيعها عباره عن قلب مبتسم فيه عينين بتبحلق
و اخر توقيع كان من نصيب الكاتب الشاب محمد الغزالى مؤلف ساديزم
و كتب انه لم يتابع بما يكفي للحكم لكنه سعيد برؤية شباب متحمس

طبعا دى بدايه سعيده لدفتر توقيعاتنا اللى نتمنى ان نضيف اليه المزيد
و المزيد من أصدقاء لمجلة بحلقة .

حاجات تانيه حصلت في اليوم

عملنا حوارات مع كتير من زملائنا الصحفيين و كلمناهم عن فكرة المجلة
بعنا كتب ب 55 جنيه فرحنا بيهم جدا لدرجة ان نانسي ممدوح قعدت تصور
فيهم و هى مش مصدقه نفسها رغم انها شريا هدايا لزوار المعرض بحوالى
200 جنيه مثلا :)
جمعنا ايميلات email ناس كتير أكيد هنتواصل معاهم و كانت أجمل حاجه

ان احنا عرفنا عمليا قيمة العمل الجماعى و تنسيق العمل و حب الفكرة
و التواجد وسط الشباب اللى نتمنى ان مجلة بحلقة تفضل معاهم على طول
تبحلق عليهم و هما يبحلقوا عليها .

و لازم أختم الموضوع بشكر لكل الناس اللى لولاهم مكنش هيتعمل اليوم الجميل ده
فريق عمل المركز الدولى للتنمية الثقافية و دار نون للنشر
كل زوار المعرض اللى اهتموا بالتعرف على مجلة بحلقة
كل الزملاء الصحفيين اللى اهتموا بالتعرف على المجله و فكرة مشاركتها بالمعرض
و طبعا كما كانت البداية بهم أختم بهم زملائى الاعزاء في المجله الذين لولا نشاطهم ما
استطعنا تنظيم هذه الفعالية في 3 ايام فقط .

وعملنا السرفاي ده في المعرض :

بحلقه سالت المشاركين فى المعرض
 وليه شاركتوا فيه ؟؟
 وإزاى إستغنيتوا عن الكتب المحببه ليكوا ؟
وإيه إنطبعكوا عن المعرض ؟؟
عمر سامي :فكره المعرض حلوه وعمر الكتب إللى عندنا حتى ولو مش هنقرها مش هنرميها  ولا حتى هنحطهم على السلم وهتبقى جميله لو إديتها للناس تقرأها وسهل إنك تستغنى عن الكتب إللى مش ذوقك وبتبقى أسعار الكتب بين 5-10 والمعرض كويس جدا يمكن أحسن من معارض الساقيه .

مى بهاء- منسقه فى دار نون للنشر :هيه فكره فريق العمل فى الدار وكل واحد عنده كتب مش عايزاها بيتبرع بيها للمعرض وأعلانا على الفيس بوك وشاركوا فيه دار الكاتب ومجله بحلقه وجابوا الكتب اللى مش مناسبه ليهم وعرضوها للبيع بأسعار رمزيه بين 2لحد 10 جنيه والكتب الغاليه عليها 50% خصم

شيماء _صحفيه ومعده فى إذاعه إسلام أون لاين :الفكره فى عمل معرض فى مكان زى المركز الدولى للتنميه والثقافه حاجه مفيده وكويسه سواء إنى اعرض او اشترى وجاتلى الفكره من صديق ليا عنده كتب والموضوع مشى _وبالنسبه ليا انا مستغنتيش لانى عندى إرتباط كبير جدا بالكتب سواء كنت بحبها ولالا وبعدين إللى إتبرعوا بالكتب هما اللى حطوا اسعارها وبعدين يعنى فى واحده جت إشتريت مجله قديمه يعنى هيه أذواق

علاء مصطفى – بشتغل فى نفس المركز وبالنسبه للكتب جبت كتب اصحابى والكتب النادره بقيت احافظ عليها والكتب إللى مش عايزاها بتبرع بيها وأسعار الكتب من 3إلى 10

فضل سالم – من دار نون وإحنا إللى عاملين المعرض اصلا والكتب الجديده بنفس سعرها ولكن 30% خصم على أسعار كتب دار نون 

 دى كانت أراء الناس المشاركه فى المعرض تفتكروا ممكن المعارض إللى بتتعمل فى المراكز الثقافيه أو الاماكن الثقافيه زى الساقيه تؤثر فى الشباب المصرى اليوم فى ظل وجود الانترنت ؟؟