إفتتاح دار إنسان وحفل توقيع " ما بعد حسن العامري "

محدش يقدر ينكر ان فى حركة ادبية شبابية طلعت فى الفترة الأخيرة  وبقينا نشوف شباب كتير بيطلعوا كتبهم للنور وكمان بقينا نشوف دور نشر جديده بتفتح القائمين عليا هما الشباب و بقينا كل يومين تلاته نسمع عن دار نشر شبابية جديدة بتفتح وبتفتح معاها امال لشباب كتير انهم يشوفوا اعمالهم مطبوعة فى كتاب يحمل اسمهم ... يمكن الكل دلوقتى بقى بينشر على الأنترنت إلا أن الكلمة المطبوعة ليها سحر خاص وكل كاتب مهما كان بيبقى فى قمة السعادة لما يشوف الكلام اللى بيكتبه بين دفتى كتاب

دار إنسان للنشر والتوزيع ... هى دار لصاحبها الكاتب الشاب طارق عميرة  الذى يؤكد أن أنشاء الدار جاء بالصدفة ويحكى لنا :: زى ما انتا عارف انا مجموعتى القصصية " ناثر البخور " نزلت المعرض اللى فات تبع دار " اكتب " المهم انا لقيت أن المجموعة بتتوزع فى القاهرة والإسكندرية بس فقولت طب ما فى مكتبات فى طنطا وفى الدلتا عموما فروحت كلمت " يحى هشام " مدير الدار فالراجل رحب وقالى خد توزيع كتابك فى  الدلتا و كذا واحد صاحبى من الأدباء الشباب لماعرف اللى انا عملته قالى طب ما تاخد كتابنا توزعه معاك لغاية ما الأستاذ يحي هشام  طلب منى انى اخد توزيع دار " أكتب " فى الدلتا و من هنا جاتلى فكره أنى اعمل دار نشر 
 

أحنا عملنا معاه الحوار ده على هامش افتتاح دار إنسان الرسمى والإحتفال بأول أصداراتها " ما بعد حسن العامرى " للكاتب " أسامة أمين ناصف "  واللى بتعد مجموعته القصصيه دى أولى محاولاته للنشر ... الإحتفال تمت اقامته فى الصالون الأدبى الطنطاوىى الذى يشرف عليه طارق عميرة وبيتمتع بشهره  لا بأس بها وشرف الأديب الكبير أجمد خالد توفيق حفل التوقيع بحضوره للصالون واثناء حفل التوقيع قرأ " اسامه امين " شويه قصص من المجموعه بتاعته واللى أشاد بها دكتور احمد خالد وبس علق الدكتور أحمد على بساطه الاسلوب وقال :: لازم يبقى فى القصص بتاعتك جزء محدش يفهمه عشان النقاد ميقولوش أن الأسلوب بتاعك ركيك وبعد كده دارت مناقشه حول هل الكاتب بيكتب للنقاد ولا للقارىء ولا لنفسه أولا