هي البنت المثقفة معقدة ؟؟؟

منطوي ... ماشى لوحده دايماً ... قاعد فى المكتبة بتاعة المدرسة أو الكلية ... غالباً بيلبس نضارة ...

دى الصورة اللى رسمها كتير جداً مننا للشخص المثقف واللى دايماً بيتقال عليه انه معقد ...

بس يا ترى حد فكر إن فى بنات مثقفات وبالتالى معقدين ؟ يا ترى شكلها هيبقى عامل ازاى البنت المثقفة وهل فعلاً ببيبقوا معقدين ويا ترى أساساً الولاد معترفين إن فى بنات مثقفات ؟! 

عملنا جولة سريعة بين الولاد والبنات عشان نعرف رأيهم فى البنات المثقفات المعقدات ... 

سألنا أحمد عبد المنعم ورد علينا وهوا بيضحك :" بنات مثقفات مين يا عم ؟! هو فى حد فيهم فاضى للقرايه ... ياعم البنات اليومين دول كل همهم انها تلبس كويس عشان تلفت نظر الشباب فى الشارع وحتى لما بتتفرج على التلفزيون فى الغالب بتتفرج على قنوات الموضة والازياء "

ولما سألنا نهال قالت : مثقفة ... قصدك قراية وكلام من دا !!  بصراحة انا ما بحبش القرايه أوى ... بس ليا صحابى كتير بيحبوا القرايه ومش لازم يكون معقدين يعنى عشان بيقروا ... عادى يعنى بنخرج ونتفسح مع بعض عادى أينعم أحياناً بيبقى ليهم أراء غريبة شوية بس عادى لا معقدين ولا حاجة . 

محمد عاطف فجرلنا مفاجأة وقال لنا :: آه طبعاً فى بنات كتير مثقفات ومش معقدين مش لازم انها مثقفة تبقى معقدة ... كلمه معقدة دى اساساً الناس هيا اللى بتقولها عليهم علشان هم  أقل منهم انتا عارف بيغيروا من المثقفين فبيقولوا عليهم معقدين ... ويوم ما افكر اتجوز أكيد هدور على بنت مثقفة أو معقدة زى ما الناس بيقولوا عليهم . 

لكن سامح جمال كان له رأى مختلف لما سألناه ممكن تتجوز بنت مثقفة : لا طبعا أتجوز واحده مثقفة ومعقدة ليه ... عشان تحرم ولادى من طفولتهم ليه يعنى ؟!  ثم بقى البنات المفترض يبقوا فى البيت لكن دى بقى هتبقى مثقفة وكل ما أجى اكلمها مش بعيد تقولى لأ مش هعمل كدا الدستور بيكفلى حريتى ! يا عم فكك ثم مفتكرش ان البنات المثقفات كتير ثم لو بصيت هتلاقيهم مبيتجوزوش اساساً . 

ولما سألنا دعاء فوجئنا بيها بتضحك أوى وقالت لنا :: تعرف أنا بيقولوا عليا انى معقدة جداً وانى بعمل من الحبة قبة وأنى بقرا وإن القرايه دى ملهاش لازمة ويا سلام لو اتفتح موضوع وأنا قاعده وسط أصحابى لازم ادخل فيه واقول أرائى وأوضحها وكده يعنى لدرجة أن احيانا الناس مبقتش تطيقنى وبيقولوا عليا دايما المعقدة بتاعتنا راحت والمعقدة بتاعتنا جت . 

رديت علينا وقالت : بص الجواز قسمه ونصيب أنتا ممكن تسأل السؤال بصيغه تانيه هيا البنت المثقفة المعقدة ممكن تتحب ؟

هقولك هو طبعاً صعب لأن الشباب دلوقتى كله بقى تفكيره تافه أوى فطبيعى لما الولد يفكر انه يحب اكيد هيدور على البنت الجميلة اللى بتلبس على الموضة وبتروح النادى وبتخرج تتفسح ومش هتقرفه لما يجوا يتكلموا عن البرجوازية !

بس على فكره البنت المثقفة مش وحشة ... دايماً الناس حطت فى دماغها أن البنت اللى بتقرا ومثقفه بتبقى وحشة ... على العكس بتلاقى بنات كتير حلوين ومثقفين وعلى فكره بنخرج ولله وبنروح سينما وبنتفسح وبنلبس على الموضة بس المشكلة هيا اننا مبنتكلمش فى الحاجات التافهة هى دى المشكلة صدقنى اللى بتواجه اى مثقف سواء كان بنت أو ولد انه اللى قدامه مبيبقاش فاهم الكلام اللى بيقوله فبيقول عليه انه معقد .