إمتى أخر مرة اشتريت فيها كتاب ؟

ياترى اخر مرة اشتريت فيها كتاب كانت من قد ايه؟

 بجد والله انا فكرت كتير قبل ما اطرح السؤال ده على الناس لأنى تقريبا كنت متوقع الاسئلة اللى ممكن – ممكن ايه – اكيد ها سمعها بس قلت وايه يعنى اما نجرب هى الحياة تبقى حياة بدون تجربة وقد كان واليكم ماحدث بس بعد ما نشوف اراء الناس ياريت نقعد مع بعض شوية ونفكر سوا بصوت عالى لو كان فى وقت

اول واحد اتكلمنا معاه كان هشام –محاسب – هشام قال :"بص بقى انا اخر كتاب اشتريته كان من سنة تقريبا وكان كتاب فى الفقه الواحد يحب يقرا شوية فى الدين برضه غير كده لم اشترى ولما سألناه ليه قال انت عارف مفيش وقت وبشتغل فى شغلتين عشان اكفى مصاريف البيت وكمان الكتب بقى اسعارها نار كنت زمان بحب اقرا للكاتب الكبير عبد الوهاب مطاوع كنت بحبه قوى.

اما كريم صفوت  - موظف – فقال "يااااه انت لسه فاكر والله حضرتك من زمان – زمان قوى يعنى – وانت شايف لا فى وقت ولا فى قرش الكتب برضه بقت غاليه وعلى رأى المثل" اللى يعوزه البيت" 

اما اسامة سمير وهو طالب هندسة فقال :"انا بذاكر بالعافية ولو فى وقت بشوف افلام اجنبى او اقضيها نت وشات مع صحابى اما قراءة والجو ده متلاقيش يا كابتن"

عبير ماهر _موظفة _ فقالت "ياعمنا البيت والعيال والشغل تفتكر ممكن الاقى وقت اقرا ده حتى المسلسلات مفيش وقت اشوفها اقولك ايه بس مش الباشا من سكان كوكب الارض زينا برضه وسع لو سمحت عاوزة الحق اجيب الواد من المدرسة"

وهكذا يا سادة يا كرام يلقى الجميع الاتهامات على كتاف الوقت والاسعار وهى حجج نقدر نرد عليها واليكم الدليل

شوف احنا بنضيع وقت قد ايه فى المواصلات ايه رأيكم نقضى الوقت ده فى القراءة "خد كتاب فى ايدك وانت خارج"

بلاش لو دورت فى حياتك هتلاقى نفسك بتضيع وقت كتير فى حاجات مالهاش لازمة استغل الوقت ده فى شئ مفيد

اما موضوع ان الكتب غالية  عندك سور الازبكية واسواق الكتب المستعملة فى المحافظات المختلفة عندك مشروع مكتبة الاسرة، انا شخصيا استفدت منه جدا

بلاش.... حضرتك بتصرف قد ايه فى السجاير ومصاريف تانية مفيش من وراها فايدة فكر كده والله  اوفرلك واحسن كتير بس انت حاول مش هتخسر واسمع كلامى هتكسب ..

ولكن اصبح لكل قاعدة شواذ ورغم انه المفروض يكون العكس .. الا انه أخدنا رأي محمد سعيد دراسات عليا قال طبعا بحب القراءة  قريت كتير جدا لكنى اعشق انيس منصور واحمد رجب كمان فى الفترة الاخيرة ظهر مجموعة هايلة من الشباب مثل هيثم دبور ومحمد فتحى وعمر طاهر قريت لهم اسلوبهم سهل وجميل