هاتحققها الوضع هايختلف واسأل مجرب !!

تمام جداً .. كويس انك وصلت للصفحة دى .. عشان تقول رأيك فى الكلام الجديد ده.. كلامنا المرادى عن المبادرة .. المبادرة انك تبدأ فى تنفيذ الفكرة اللى بقالها كتير فى دماغك .. او تعدل افتكاسة مركونة فى درج من ادراجك .. او ورقة صغيرة فى المحفظة بتاعتك .. او بيتين شعر كتبتهم وانت مخنوق ..

الشخص المبادر هو الشخص اللى مابيستناش الشىء يحصل .. هو بيصنع بنفسه الحدث اللى هو عاوزه يحصل

انك تاخد قرار بانك تعمل اى حاجة وتعملها فعلا .. كده انت شخص مبادر .. نجاح اى فكرة فى الدنيا هو فى الاساس مبادرة باتخاذ قرار .. اى مشروع .. اى كتاب .. اى فكرة .. بحلقة مبادرة .. الفيس بوك مبادرة .. دراستك مبادرة ... حياتك مبادرة .. انك بتقرى الكلام ده دلوقتى دى مبادرة منك بانك عاوز تعرف اكتر..

وكالعادة كلامنا الكتير عن الظروف بيخلينا نقف محلك سر .. اقولك على حاجة قالها الكاتب الساخر " مارك تواين " .. متفضلش تشتكى لده ولده وتقول ان الدنيا مستقصداك او معانداك .. الدنيا اصلا مش مديونة ليك بأى حاجة : لانها ببساطة كانت موجودة من قبلك .

المبادر هو الشخص اللى يقدر يحدد ايه يقدر يغيره وايه ميقدرش .. عشان كده مبيضيعش وقته فى تغير حجات مش هتتغير .. وبيركز اكتر على الحجات اللى بإيده يقدر يطورها ويصلحها ..

الواقع اللى انت بتعيشه .. مش الاحداث .. الواقع .. هو اللى بتعمله تجاه الاحداث دى .

عشان كده حياة كل واحد فينا مبادرة .. بادر بنفسك و اوصل لحلمك .. ولو مش شايف حلمك .. متدورش عليه .. اصنعه انت بنفسك .. حياتك انت المسئول عنها مش حد تانى .

هيلين كيلر .. العامية والخرسة والصمة .. بادرت بامكانيتها ومقعدتش تفكر فى اللى ناقصها .. لدرجة انها كتبت عن موقفها ده " اعطانى الله الكثير جدا من النعم .. وليس لدى وقت للتفكير فيما حرمنى منه " كلمات رائعة .. هيلين بادرت وركزت على اللى تقدر تعمله .. فكرت بايجابية ومشتكتش ..

فيه مقولة غربية بتقول ".. فى طريق الحياة .. هناك مسافرون وهناك قادة .. ومن ( يرغب ) فيهم .. هم القادة "... فقط أرغب .. قول انا عاوز اعمل .. وبعدين اعمل .. وبعد كده استنى النتيجة .. ولو مفيش نتيجة .. اصنع انت نتيجة .. نتيجة تحفزك .. نتيجة تشجعك

لما ببص على حياتى الشخصية بأكتشف ان اى نجاح انا حققته فى كل مراحل حياتى كل مبادرة منى بإنى اكون .. اى ناجح بيفكر بنفس الطريقة .. طالما انك بتفكر وبتبتكر .. متفضلش حابس افكارك جوه دماغك .. لانها هتحمض .. او حد تانى هينفذها !! .. لان طالما البيئة واحدة .. فالافكار بتكون قريبة من بعضها .. وبدل ماتصرح لحد عن ( أفكارك ) قوله استنى .. وخليه يشوف ( أفعالك ) وأفعالك هتديك دفعه انك تبتكر افكار تانية .. والافكار تبقى افعال .. و تحس انك بتنجز فعلا .. ولما تنجز تبقى ناجح ..