أحمد عمرو -13 سنة يكتب : حكايتى مع مباريات كأس العالم للشباب

 بحب الكورة زى اى حد مصرى بعد ما شوفت اول ماتش فى ماتشات مونديال الشباب و فوز مصر على ترينداد 4-1 عجبنى الموضوع قلت ما تيجى تجرب ؟؟؟ طيب تجرب ايه ؟؟؟

قلت آخد صحابى و نروح الاستاد نتفرج على مطش مصر مع البارجواى الحقيقة انبسطبنا جدا بالرغم إن الظروف اللى عدت علينا كانت صعبة شويه ولكن كانت تجربة لطيفة.

 المهم احكيلكم اللى حصل من طأطأ لسلامو عليكوا الاول صحابى قالوا ان البوابات هتقفل على الساعة 3 و يا ريتنى ما صدقتهم المهم انا وصحابى جبنا حاجتنا معانا من مياه و بيبسى و ساندويتشات و فجأه و إحنا داخلين سمعنا رجل بيقول مفيش مياه ولا بيسبى قلنا يلا مش مشكلة لكن اللى احنا بجد زعلنا منه انهم كمان خدوا الاكل وكل حاجة و المشكلة الكبيرة للمواطن البسيط ان الحاجة جوه سعرها مولع نار يعنى مش حرام لما تكون زجاجة المياه المعدنية ب 6 و 7 جنيه ولا كيس الشيبسى العائلى اللى ب 6 جنيه و (كله من ده) كل حاجة بضعف الثمن و ساندويتش البرجر والسوسيس الرخيص يعنى اللى بره ب 2 جنيه يتباع جوه ب 3.5 طيب ازاى المواطن البسيط يدخل درجة تالته

لكن و بصراحة الناس دى تشكر على حسن التنظيم جوه الاستاد و كمان الدخول السهل من البوابات و على التجهيزات اللى فى المعلب من ارضية و شاشات و غيره .

نقطة اخرى مهمة حبيت اتكلم عنها و هى انا احنا بنشجع المنتخب فمن الخطأ الكبير ان احنا نخلى المنتخب اهلى و زمالك طيب ليه!احنا ساعتها بنلعب لاسم مصر مش للزمالك ولا للاهلى و ليه كل لعيب نازل يلعب لمصلحته و يعنى لما بوجى جاب اجوال الفوز ضد ايطاليا شتم الجهاز الفنى اه غلطان ولكن الاهلاوية كل لما تسأل و (ده حصل امام عينى) حد سأل هو بوجى ده بيلعب فين قالو فى الزمالك قالو طيب عايز اخلاقه تكون ايه .

احنا خلينا المنتخب اهلى و زمالك دى عقلية فعلا رجعية للغاية احنا بنلعب لاسم مصر مش لحد غيره فبلاش شغل الكره اللى بين الاهلاوية و الزمالكوية احنا فى الاخر اخوات و شعب واحد فعيب ان يكون كده.

انا نفسى اشوف الارتقاء زى بره يعنى عندك فى اسبانيا ريال مدريد و برشلونه خصمين لكن عمرنا ما شفنا خناقه و لا شتيمه و لا اى حاجة عشان الناس دى عقولها متفتحة و ناس بتحب بعض و عارفين ان لاعيبة الريال و البرشا الاسبان فى الاخر بيلعبوا للمنتخب اتمنى ان لا ارى عنصرية بين الاهلاوية والزمالكوية و نحب بعض و نخاف على بعض و نقف جنب المنتخب الكبير والشباب.

اتمنى فى نهاية الموضوع ان احنا نستفيد منه و شكرا يا مصريين