الرئيسية | إيه النظام ؟ | أغلى هدية عيد أم لأحلى مصر .. وهي رجوع بابا مبارك

أغلى هدية عيد أم لأحلى مصر .. وهي رجوع بابا مبارك

20 March, 2010 09:30:00 أحمد الساعاتي

حجم الخط:

انا عارف ان اولادك كتير وانا واحد منهم انا ابنك "سيد عبدالقوى" 27 سنة والكائن بحى الشرابية

بحبك قوى يا أمى احترت اعبرلك عن حبى ليكي ازاى معرفتش ومش هعرف بس المهم انك تعرفى انى بحبك يا أمى...كان نفسى أبقى زى كل الناس اللى بتجيب هدايا لأمهاتهم فى عيد الأم لكن هاجيب منين ما أنتى عارفه اللى فيها، أشتغلت كتير أوقات كنت بشتغل ليل ونهار علشان أكفى علاج أمى "أمى اللى بحق وحقيقي" اللى بتحتاج تغير دم كل اسبوع دى بقالها على الموال ده ثلاثة سنين، ده غير أختى اللى عايز أجهزها علشان تتجوز الواد "سعد المكوجى" لحسن دول مخطوبين لبعض من زمان أوى، ده غير مصاريف أخواتى الصغيرين اللى لازم يتعلموا وانا معرفش ايه فايدة العَلام وسنينه بس أعمل ايه دى كانت وصية أبويا قبل ما يموت،

ده انا حتى فسخة خطوبتى مع البت "جميلة" بسبب التنطيط اللى هى فيه كل يومين تقولى جالى عريس مش عارف عامل ازاى وعنده ايه وبيشتغل فين قرفتنى مع انها عارفة انى شايل مسؤلية البيت كله ومعييش اتجوزها دلوقتى، ده انا حتى فكرت اخرج بعيد عنك واشتغل واكون نفسى وارجعلك بالخير كله..لاقيتك مش قادره على فراقى بصراحة من يومها وانا بعزك اوى،

يااااااه يا مصر كنت هنسى أقولك على الهدية اللى جايبهالك...والله انتى رزقك من السماء ومكونتش عارف أجبلك هدية منين لكن أول ما عرفت قولت لازم أكون انا اول واحد يقولك...انا عرفت يا مصر ان "بابا مبارك" هيرجع أخر الإسبوع من المانيا بعد العملية اللى كان بيعملها فى معدته انا مش قادر أتخيل فرحتك بالخبر ده لما أقولهولك،

انا عارف انتى بتحبيه قد ايه ده انتوا بينكوا عشرة أكتر من 28 سنة ده انتوا الاتنين بقيتوا شبه بعض الفرق ان هو لما حاجة بتوجعه بيروح يتعالج عند واحدة غيرك انما انتى عامله زى أمى لما بتتعبى بتاخدى أى مسكنات وخلاص ولو الموضوع كبر حبتين بتطلبى حد يتبرعلك بشوية دم، أوقات كتير كده بسرح فى قصة حبك مع بابا مبارك ويجي فى بالى شوية أسئلة يعنى مثلا أقول هما أتعرفوا على بعض ازاى، انتى بنت الناس الأكابر قابلتى الرجل العسكرى اللى كله حزم وربط وأوامر وطاعة فين واتعرفتوا على بعض ازاى..ببعد عن تفكيرى انه خطفك واتجوزك غصب عنك لانك مش معقولة حد هيخفك وتحبيه كل الحب ده..اه بتحبيه ما انتى لو مش بتحبيه كان اولادك قدروا يخلصوكى منه..يكونش اولادك مفيهمش واحد بار بكي؟؟؟

نرجع لموضوعنا مش مهم اتقابلتوا ازاى وعملتوا ايه بس المهم انكوا دايبين فى بعض ده انا لاحظت انه بيحبك أكتر من نفسه لدرجة انه أول ما لاقى فى واحد عايز يخطفك منه مقدرش يستوعب الفكرة أصلا وصحته تعبت..للدرجة دى هو بيعشقك؟؟

كان نفسى البت "جميلة" تطلعلك يا مصر اقولها يمين تروح يمين شمال يبقى شمال مش مهم تكون مقتنعة بكلامى بس المهم ان كلمتى هى اللى ماشية حتى وهى عارفه ان كل كلامى غلط، بس ارجع واقول لنفسى هو انا كنت زى مبارك علشان جميلة تبقى زيك يا مصر..

انا كنت بفكر ألم اصحابى واروح استقبله عند المطار لما يرجع علشان عارف انتى بتتمنى رجوعه قد ايه لكن لاقيتهم بيقولوا مش عايزين حد يستقبله مش عارف ليه يحرمونا من استقباله يمكن يكون انا واصحابى عددنا أقل من اللى استقبلوا الرجل اللى عايز يخطفك منه؟؟؟

بس لا ده احنا كتير أوى ولو روحنا هنبقى اكتر من الامن بتاعه كمان ولو عايزين نوصله بعد الامن ما يضربنا هنوصله بس احنا مش عايزين نقلق رحته مادام عايز كده خلاص هو ادرى بمصلحته أولا اللى هى فى نهاية الامر مصلحتك يا مصر....بس خليكى فاكره يا مصر انى حاولت كتير أعبرلك عن حبى وانتى اللى مش عايزة...وبتحوشينى

أضف إلى: Add to your del.icio.us