جم يكحلوها عموها

مش بالضرورة دايما نقعد نهاجم النظام عشان الوضع البائس المخيم على صدورنا في مصرنا المخروسه ..اوحتى عشان ندعي بطولات او نثبت اننا متابعين كل حاجة وفاهمين اللي بيحصل

انما السؤال : هل صحيح دايما الحكومة والنظام غلط واحنا اللي صح

.. هما مبيعملوش حاجة كويسه خالص فعلا ؟

انا مش مصدق بصراحه .. لأنها حكومة ذكيه والشعب اللي مش قادر يرتقي لمستواها النظيف

اقولكم على سبيل المثال  

الحكومة والنظام لما كل يوم بيضيقوا الخناق على الشعب سواء بقوانين مسلوقه او اغذيه فاسدة او رشاوي حكوميه كبيره او فساد سياسي او او الخ الخ فأكيد هدفهم في الاخر هو اييييييييه ؟

 اكيد طبعا ان الشعب يشق هدومه ويطلع منها .. هما فعلا عملوا كده ..بس حسره عليها ياحسره عليها .. جم يكحلوها عموها

وهقولكم ليه .. لأن كل ما النظام يضغط في الاتجاه ده .. الناس بدل ماتتفرق وتختلف وتنقسم على نفسها وهو هدف امريكي طبيعي كما تتطور الحاجة الساقعه في المنطقه .. نلاحظ اتفاق الناس على عدم الرضا عن الحكومة ..!

سبحان الله .. جم يكحلوها عموها .. بالنسبه لهم طبعا 

لكن بكل أسف نجحوا في تغيير المعادله لصالحهم برضه ، لما قدر يغيروا جينات الشعب المصري على رأي الأستاذ محمد حسنين هيكل .. صحيح الفساد وتردي الأوضاع جمعت الناس في جبهه واحده

لكن مافائدة ذلك بعد ما فقد الشعب شهيته لتغيير أوضاعه بنفسه باعتباره المصدر الحقيقي للسلطات