قريبا : مصر تحت الحصار !

1- الأمن المائى .. متخفش ده غير الأمن المركزى .. ومعناه إن حق مصر التاريخى من المياه المقدّر بأكثر من 55 مليار متر مكعب .. محدش يجى ناحيته .. لأن مصر مش ناقصه .. فمصر تجاوزت حد الفقر المائى وهى دولة الصحراء الاولى فى العالم وتعتمد بما يقرب من 90% على مياة النيل .. غير إنها بتعانى من عجز فى المياة ومن المتوقع إرتفاع العجز وتضخمه بشكل مفزع فى السنوات القادمة!

2- الإخطار المسبق قبل إنشاء أى مشروع فى دول المنبع .. لإن دول المنبع فى ظل تعاون إسرائيلى بتقوم بتنفيذ وتخطيط مشروعات من شأنها نقص الوارد من المياة لمصر والتحكّم فى حركة المياة .. مما قد يجعل مصر تضطر لشراء المياة!

3- إتخاذ القرارات بالإجماع أو الأغلبية المشروطه بموافقة مصر والسودان "دولتا المصب" .. لإن ممكن تلاقى التمن دول بتوع المنبع عملوا إتفاق ما بينهم وبين بعض و جابوا بحصة مصر الأرض .. الحصة اللى تقررت من إتفاقيات عامى 1929 و 1959 .. وأصلا دول المنبع لا تعانى من نقص فى المياة .. إذا كانت أثيوبيا الممد الرئيسى لمياة النيل بتعتمد على مياة النيل بنسبة 1% فقط لا غير لإنها عندها أمطار كتيييييييير .. بس طبعا هى حليف إستراتيجيكى لإسرائيل!

 وفى ظل إن 95% من إيراد النهر البالغ 1600 مليار متر مكعب بيتبخر وبيضيع فى إساءة إستغلاله من دول المنبع .. تلاقى دول المنبع عاوزة تعيد تقسيم ال 5% الباقيين واللى همّا حق (مصر + السودان المقدر ب 84 مليار متر مكعب) ولو إعتبرنا إن ال84 مليار دووول فطيرة وقسمنّاها على عشرة .. يبقى مصر خدت ........ كحكة كبيرة .. ده غير إن أصلا بقية الدول اللى هتاخد نصيبها من الفطيرة هترميها فى الزبالة ومش هتاكلها .. لإنها مش محتاجه هو مجرد إستعباط أو قل أوراق ضغط سياسية .. تحركها نجمة داوود المزعومة .. ومع كده تيجى تتفرج بقى على أوراق الضغط المصرية متلاقيش .. إلا التلويح بالمثول أمام المحاكم الدولية .. وتلاقى المسؤليين المصريين عمّالين يتكلموا عن التفكير فى بدائل للمياة والتفكير فى المزيد من التطبيع والإنبطاح مع إسرائيل وزيادة صادرات مصر من الغاز للصهيونية بتراب الفلوس والتطبيع الثقافى المعلن و ........... هو ده الحل المطروح عند حكومتك!

 وياريته نفع ما اهه التلويح بإنكار دول المنبع للإتفاقيات المسبقة وبحثها عن مصالحها والفلوس والدعم اللى بيجيلها من إسرائيل سواء سياسى إقتصادى ثقافى علمى .. يعنى يا مصر إخبطى راسك فى الحيط .. ومصر طبعا قبل ما تخبط راسها تروح تدعم نفسها الاول قبل ما تفكر فى وضع خطة تنموية شاملة فى دول حوض النيل "كما جاء على لسان رئيس الوزراء نظيف" .. بس هل هنعرف ندعم او نتعاون مع دول الحوض أو الأصح الحنفية "المنبع" وإحنا بندعم الغاز المصدّر لإسرائيل بأبخس وأحقر الأثمان ده غير الكويز و .......... مؤيدين بذلك الكيان المحتل ليزيد فى إحكام طوقه حوالين رقبتنا فى ظل سياساته التوسعية المعلنة!

 والأن الحل ! .. هل سيكون الشعب المصرى هو "عروس النيل" اللى هتترمى ليفيض النيل بخيره على "هبة الله" .. أم سنقول كما قال عمر رضى الله عنه:

((من عَبّدْ الله عمر أمير المؤمنين إلى نيل أهل مصر ، أما بعد فإن كنت تجري من قبلك فلا تجرى ، وإن كان الواحد القهار يجريك فنسأل الله الواحد القهار أن يجريك)).

 واهه إحنا كده سبرايت قصدى صابرين .. غافلين وقريبا عطشانين .. و أصحاب القرى السياحية وملاعب الجولف مش فارقه .. الميه المعدنية موجوده وصدق اللى قال .. عيش حياتك مع كوكاكولا !

 ليعيش أو يموت خطنا الأحمر النيلى (شريان حياتنا) ويموت أمننا القومى تحت الحصار !