أمال على المحاره!!!!!

لو انت راكب تاكسى ورايح من أى حته لأى حته فى امان الله ومرة واحدة سمعت خبطة جامده بصيت لقيت ميكروباص راكب على العربيه اللى قدامك... عادى، حادثه تفوت وفى ناس بتموت مش موضوعنا.. المهم لو أنت فضولى شويه ووقفت تفهم هتعرف من سواق الميكروباص ان فرامله خفيفة (وهو عارف) ولو حشرت مناخيرك شويه زياده وقلتله طب ليه تسوق عربيه فراملها خفيفه مش خايف على روحك ولا على الناس اللى معاك؟

هيقولك ما انا كنت لسه هصلحها وبعدين هيكلمك على العيال وأمهم والعيشه واللى عيشينها وفى الاخر هيقولك ياعم ده اكل عيش و"خليها على الله".

لو الراجل بقى اللى عربيته اتخبطت ده متمسك بحقه شويتين زياده هياخد السواق ويطلعوا رحله للقسم.. وانت بقى لو فضولى تلات شويات ممكن تروح معاهم.. هناك هتعرف ان كمان سواق العربيه المخبوطه فرمل فجأه .ليييييييه؟؟؟ لأن الفرق بين عربيته والعربيه اللى قدامها كان حوالى 2سم مش اكتر ويادوب لحق نفسه قبل ما يسبلها تذكار.

لو الظابط سأله وقاله: ايه اللى مخليك لازق فى اللى قدامك كده؟ هيقوله: يا باشا ما أنت عارف الدنيا زحمة ومراتى لسه ولده وابويا الله يرحمه عيان فى المستشفى وأنا مستعجل عشان عايز الحق اجيب العيال من المدرسه .وبعدين احنا بنتكلم فى ايه "خليها على الله".

لحد هنا وكفايه مش لازم نروح معاهم النيابه ولا نتحجز فى القسم.

بس ايه المشكله فى الرغى ده كله؟؟؟؟

المشكله ان ساعات كتير بنقول كلام حافظينه مش فاهمينه...اسطمبات يعنى.

خليها على الله كلمه جميله  بس ده شئ بديهى كل حاجه بنسيبها على الله، أمال بنسيبها على المحاره؟؟؟؟!!!!!!..

المهم اننا نفهم يعنى ايه خليها على الله؟ المفروض ان ربنا امرنا نعمل اللى علينا الاول وبعد كده نسيب الباقى على ربنا. يعنى سواق الميكروباص اللى ماشى من غير فرامل ده قبل ما يقول خليها على الله لازم يعمل الأول اللى عليه ويصلح عربيته قبل ما يحركها من مكانها عشان دى أرواح ناس. هيروح طالع السواق من الحجز دلوقتى ويقولى "يا عم الاعمار بيد الله انت هتكفر؟"

هقوله ياسيدى مش الاعمار بس ده كل شئ بإيد ربنا لكن الأسباب بأيدينا احنا. وربنا بيسبب الأسباب وأمرنا ناخد بيها.

يعنى صاحب العربيه اللى اتخبطت ده كمان (اللى ابوه الله يرحمه تعبان فى المستشفى) كان المفروض يسيب مسافة بينه وبين اللى قدامه قبل ما يسيبها على الله. يعنى مش ال كام سم زياده دول هما اللى هيعطلوه. ولا ايه؟؟

اللى عايز اوصله ان قبل ما نقول كلمه لازم نبقى فاهمينها الاول مش بس حافظينها ونبقى مدركين اننا بنقولها فى محلها عشان بعد كده "منتخبطش" فى حياتنا - او فى عربيتنا - بسبب قله فهمنا ونقول ياريت اللى جرى ما كان...ولا هنوجع دماغنا ليه "خليها على الله".