مجلة بحلقة - القارئ يكتب .. القارئ يقرأ: ليه البنات مبتتجوزش ؟؟

ليه البنات مبتتجوزش ؟؟
================================================================================
علياء ناصف on 03 November, 2009 06:33:00
 
العنوسة.. طبعا كلمة مش لطيفة أبدا ومحدش بيحب
يسمعها مننا احنا البنات.. بس نعمل ايه لازم
نواجه ونتكلم وما نحطش جوه نفسنا ونسكت..
قررنا فى "بحلقة" ان احنا نتكلم بصراحة ونفتش
وندور ليه العنوسة انتشرت بالشكل المخيف ده
وليه مبقاش حد بيتجوز؟!! لا بنات وبالتالى
طبعا ولا ولاد.. ايه اللى جرى وايه اللى حصل؟!
مفيش بيت من بيوتك يا مصر الا وفى بنت لسه ما
اتجوزتش والناس يمكن بدأت تتكلم ويمكن كمان 
البنات بدأت هى كمان تتضايق من كلام الناس"
عقبالك يا حبييبتى" عايزين نفرح بيكى" وهو ده
طبعا الكلام اللى على خفيف ولكن طبعا الناس
اللى دمها زى السكر ولسانها زى العسل! ممكن
يقولوا كلام يزعل البنات ويجرح مشاعرهم.. هاه
تحبوا تسمعوا البنات بتقول ايه ومش بس البنات
اللى هنعرف رأيهم لاااااااااا! ده كمان
الشباب اللى ناوى يقضيها عزوبية!!! وكمان
هنسأل الرجالة المتجوزين أخبارهم ايه مع
الجواز.. مش هطول عليكم من الآخر هنسأل كل
الناس
يارا "معيدة فى كلية الصيدلة": اتقدملى واحد
صيدلى وما رضيتش بيه لانه مش هيبقى فى نفس
مستوايا الثقافى.. أنا معيدة يبقى لازم اتجوز
معيد زيى.. مش كده ولا ايه
والدة يارا بتقول: وأنا فرحانة اوى لما بنتى
بقت معيدة واهه دلوقتى مش لاقيين حد فى
مستواها لدرجة انى بافكر انى اقولها تسيب
التدريس فى الجامعة وتحول لأى شغل تانى يمكن
تلاقى الشخص المناسب
لمياء "بكالوريوس اعلام": انا كل اللى طالباه
بنى ادم.. انسان.. عارفة البنات الشاميات لما
بتسأليهم ايه مواصفات فارس احلامهم بيقولوا
ايه؟! بيقولوا "عايزاه آدمى" وانا مش عايزة
اكتر من كده
سالى "معيدة برضه فى احد الكليات": بصراحة انا
شغلى كل حياتى وبيشبع احلامى ومش حاسة انى
هاموت على الجواز.. وعمرى ما هااسعى ابدا انى
اتجوز الا اذا كان فيه شخص مناسب ليا من كل
النواحى
امانى "بكالوريوس تربية": انا من ساعة لما
خلصت كليتى وانا خروجاتى محدودة الناس
بتقولى لازم تشتغلى وتشاركى فى النشاط
الاجتماعى يمكن تلاقى ابن الحلال لكن انا مش
محتاجة لشغل ولا لفلوس الشغل وبعدين نصيبى
هايجيلى لحد عندى وانا بحب البيت وبيتوتية
الى اقصى درجة
كريمة "موظفة":تم عقد قرانى ولكن الموضوع لم
يكتمل لأن الاهل عامل مهم جدا.. ومع العشرة
عرفت ان اهله وطبيعتهم مش هيناسبونى وبالرغم
انى اصبحت مطلقة وده احسن بكتير من انى اتجوز
واحد هو واهله يتعبونى معاهم
سارة "سكرتيرة":تمت خطبتى للمرة الثانية
والمرة دى برضه شكلها هتتفشكل. الأول له
علاقات مع بنات وعايز يقطع صلتى باهلى
وبيتكلم معايا باسلوب الهزار بالشتايم وده
اللى عمرى ما هقبله ابدا اما العريس الثانى
عايزنى اقعد فى البيت وأنا عايزة اشتغل مش
عارفة اعمل ايه
دى اراء بعض البنات طبعا مش البنات بس اللى
قالوا رأيهم زى ماقلنا لكم احنا سألنا كل
الناس بس تعالوا نشوقكم شوية ونقول لكم
استنونا العدد الجاى علشان نعرف رأى الأولاد
هما كمان ماهى مجتش عليهم! وكمان لازم طبعا
نسأل احد المتخصصين اللى لينا حديث طويل معاه
بس كل اللى عليكم تتابعوا معانا ملف ليه
البنات ما بتتجوزش؟! وياريت انتوا كمان
تبعتولنا رأيكم علشان الموضوع عايز كل
الناس.. وقول كلمتك يا ابن بلدى بصراحة وما
يهمكش حاجة ابدا..احنا يهمنا كلمتك