تحت شعار: و داعاً "مكتب التنسيق" كلنا هندخل كليات القمه..!

أخيراً خلصت أمتحانات الثانويه العامه وكمان النتيجه ظهرت ..ياااااااه هم وانزاح و خلاص كبرنا وهنروح الجامعه ونغنى كمان الناجح يرفع أيده..

 أما عن "عالم الجامعه" فأكيد سمعت إنها مرحله مختلفه عن أى مرحله قبل كده و فيها إنفتاح أكتر, هتلاقى الجامعه فيها طلبه وطالبات من مدن وقرى و فى أختلاف بينهم فى العادات والتقاليد والأفكار , و لازم تحاول إنك تتعامل مع الكل حتى لو طريقه تفكيرك مختلفه عنهم لازم تتتعلم تتعامل مع ناس مختلفه عنك فى التفكير و الميول .. 

أما بقى عن "نظام الدراسه "فى الجامعه فهو مختلف تماماً عن نظام التعليم فى المراحل اللى قبل كده ، الدراسه فى الجامعه بتعتمد على جهد الطالب الفردى لأن الاستاذ الجامعى مش زى "المدرس" بيديك كل حاجه أنت عايزها فى الماده لا هو مجرد بيقولك الماده دى بتتكلم عن أيه و الباقى عليك أنت وشطارتك و جهدك فى الحصول على أكبر قدر من المعلومات سواء من خلال المكتبه أو الأنترنت .. 

كل ده كويس و شويه شويه هتتعود على جو الكليه ،بس فى حاجه أهم هى إزاى تختار الكليه اللى هتدخلها؟؟و إزاى تقدر تستمر فيها ؟؟ و تتفوق فى التخصص اللى أخترته و متعرفش حاجه اسمها تقدير "مقبول جداً".. 

فى دراسه بتقول أن أكتر من 40% من طلاب الجامعات بيحولوا من الكليه بعد السنه الأولى نتيجه لسوء إختيارهم للكليه المناسبه.. و ده يدل أن فى طلبه كتير مش عارفه هى عايزه تدرس أيه بالظبط ؟؟ أو يكون مكتب التنسيق حدفهم على كليه مكنتش فى الحسبان علشان المجموع مجبش غير كده؟؟ 

الحيره و القلق والتردد مشاعر هتسيطر عليك و أنت بتختار الكليه اللى تناسبك , و ده طبيعى لأنك بتحدد مسار حياتك العمليه و مكانتك فى المجتمع بعد كده.. 

أولاً هنتكلم إزاى تختار الكليه المناسبه ليك:  أهم حاجه إنك تختار كليه تناسب ميولك وأهتماماتك و سماتك الشخصيه ،لأنك كل ما تحب دراستك كل ما هتنجح فيها أكتر،  كمان تكون مناسبه لقدراتك ، يعنى يا ترى هتقدر تتحمل الدراسه فى الكليه دى  و تستمر فيها ولا لاء؟  يعنى مش معنى إنك بتحب الرياضه إنك هتكون مهندس شاطر ، لكن ممكن تكون مدرس رياضه ناجح جداً..و أكيد مدرس ناجح أفضل من مهندس فاشل،وكمان  تختار تخصص يكون سوق العمل محتاجه, و تخطط إنك تستفيد من دراستك مش مجرد شهاده هتعلقها فى الصالون.      

    و كمان سيبك من موضوع "كليات القمه" ده ومتشغلش بالك بيه، لأن لكل فرد فى المجتمع دور بيتميز بيه عن غيره و المجتمع فى حاجه لكل المهن و التخصصات الدكتور زى المهندس زى المدرس زى المحامى يعنى كل الكليات هى "كليات قمه"..   المهم إنك تختار الكليه اللى أنت عايزها و شايف مستقبلك فيها وهتنجح فيها أكتر و معيد فى كليه حقوق أو محامى شاطر(بإعتبار أن كليه الحقوق أقل كليه فى التنسيق دلوقتى) أفضل من طبيب فاشل..!! 

    ثانياً نفرض أن الكليه اللى أنا عايزها و مناسبه ليا للاسف مجموعى مجبهاش و مكتب التنسيق حكم عليا بكليه مبحبهاش ..أعمل ايه؟؟ 

فى حلين:

 الاول: إنك تشوف مجموعك يسمحلك تدخل كليات إيه ؟؟،و تختار أقرب الكليات لميولك و تشوف أى من الكليات الموجوده هتقدر تكمل فيها و تغير مسار حياتك العمليه معاها..

 و الثانى: إن لو مفيش حل غير كليه واحده يبقى تحاول تنجح فيها و تثبت لنفسك أولاً و لغيرك إن أى مجال هتكون فيه هتبقى متفوق فيه،و الثانويه العامه مش مقياس لشطاره أى أحد..

 و علشان من حقهم عليك إنهم ينصحوك و من حقك إنك  تستفيد من خبره  اللى سبقوك..بعض طلبه الجامعات المختلفه هيكلموك عن "عالم الجامعه"

: فاطمه(كليه الأقتصاد والعلوم السياسيه): متنبهروش بالحياه الجامعيه، و متفتكروش إنها راحه بالعكس الجامعه هى بدايه للمذاكره اللى بجد ،و تحاولوا تخلقوا لنفسكم شخصيه و هدف بين الناس.. 

كريم(كليه الهندسه): أن أول يوم تعملوا ورشه عمل مع الدفعه اللى قبلكم علشان تعرفوا نظام الكليه و المكتبات و الدروس،و بحذرهم من البنات ثم البنات لأن البنات فى الجامعه أخطر من المخدرات...!!

 مروه(كليه التجاره): اقولكم أنكم تهتموا بالدراسه وحضور المحاضرات والسكاشن و يسبوهم من الحوارات والتظبيط..

 رضوى(كليه الخدمه الإجتماعيه):متسمعوش كلام أى حد يقول إن الجامعه دى لعب و هزار و قضيها لأن الجامعه مش كده خالص..

 احمد(كليه الطب):مرحله المذاكره ما انتهتش دى غالباً ابتدت، وحاول تأقلم نفسك على نظام كليتك و تلغى من دماغك أى أفكار مسبقه عن الكليه بتاعتك ،لأن مثلا كليه الطب المفروض إنها كليه عمليه و رغم كده طلبه كليه الطب بيعانوا من حجم وكثافه المواد النظريه اللى بيدرسوها، و كمان من الأفضل إنك تشارك فى الأنشطه الطلابيه اللى موجوده فى الكليه هتفيدك كتير و انتهز كل فرصه ممكن تشارك فيها برأيك او بمجهودك فى حاجه مفيده..

 "الجامعه" هدف بنسعى إليه من أول ما اتعلمنا"الف  باء" و من صغرنا وإحنا بنحلم  ندخل الجامعه و لما حد بيسألنا نفسك تبقى إيه ؟؟ بنقول حاجات كتير و مهن مختلفه و بنسعى علشان نوصل لكل الأحلام اللى عاشت معانا خلال كل مراحل التعليم المختلفه وصولاً لأهم مرحله فى حياتنا وهى "الجامعه",علشان كده لازم تعرف أن الجامعه مش معناها إننا اتخرجنا و داخلين نلعب ونهزر و نقضيها بالعكس فشلك فى المرحله دى هيهدم اى تعب عملته قبل كده لأن الشهاده الجامعيه تتويج لكل مراحل الدراسه اللى قبل كده..و بالتوفيق للجميع..