حسن شحاته الأنجح أم الأفضل ؟

بطوله عربيه وتصفيات كاس عالم وبطولة كاس عالم للقارات و3 بطولات افريقيه دي كل المشاركات الرسميه اللي تولي فيها حسن شحاته ( المعلم ) قيادة منتخب مصر وحقق 3 بطولات افريقيه وبطوله عربيه ووصل لمباراه فاصله في تصفيات كاس العالم وعمل اداء وسمعه مشرفه للكره المصريه في كاس القارات وبكل المقاييس والمقارنات مع اي مدرب مصري او غير مصري هيكون شحاته انجح مدرب في افريقيا ومن انجح المدربين في العالم

لكن ورغم كل الانجازات دي بنلاقي عدد مش قليل من النقاد والجماهير شايفين انه مش الافضل من ناحية التكتيك وفنيات الكوره ولوسالتهم طيب ازاي بيكسب كل البطولات دي لو هو مش الافضل فعلا هيقولوا انه محظوظ وفيه شئ لله بس لو الحكايه حظ وبركه يبقي اي شيخ او ولي ممكن يحقق اللي حققه المعلم .

عشان فريق يحقق النجاح مش شرط انه يكون بيضم احسن لاعيبه ومعاه احسن مدير فني لكن شرط يكون بيضم لاعيبه معاهم مدير فني بينه وبينهم تفاهم ويقدر يطلع منهم كل اللي هو عايزه وسواء اتفقنا او اختلافنا مع طريقة تعامل المعلم مع اللاعيبه مش هنختلف انه صاحب الحق في اتباع اي اسلوب يشوف انه هيحقق الهدف وحسن شحاته اظن انه اكتر واحد عارف ان سر نجاحه مش كوره وبس لكن الحاله اللي قادر يوجدها بين اللاعيبه واللي بتكون اختياراته علي اساس مين اللي يقدر ينسجم مع الحاله دي وده هو سبب استبعاده لميدو واختيار جدو مكانه لان بكل الاحوال ميدو لاعب امكانياته عاليه جدا لكن المعلم اهم عنده الهدوء والتواضع والتركيز وده اللي رجح كفة جدو

طريقة المعلم دي هي اللي كانت السبب في ابقاء حسني عبد ربه في التشكيل الاساس طول بطولة انجولا لان اي مدرب تاني بيشتغل كوره بس كان اكيد هيطلع حسني اللي ماكنش في حالته من اول البطوله لكن شحاته اتعامل معاه علي انه حسني احسن لاعب في غانا 2008 وكان عارف انه هياثر علي اللاعب كتير لو قعده احتياطي وفضل يسانده لاخر ماتش يعني اتعامل معاه كاب مع ابنه ومواقف تانيه كتير زي خطة مشربتش من نيلها ويا حبيبي يا رسول الله اللي كانوا مجال لسخرية بعض النقاد والجمهور لكن كل دي ادوات المعلم لتنفيذ طريقته اللي اساسها الحب والتواضع والاخلاص .