محدش يعرف حد من اللي مسافرين أنجولا ضروري الله يخليكم

لو حد عارف حد مسافر أنجولا يابشر ينوبكم ثواب يقولي في مرساااال كدة لعم سمير زاهر ورجالتة بتوع إتحاد الكورة في أنجولا.

لامؤاخذة المرسال ده مهم جدا بدل ماهما مسافرين علي حسابي وحسابك وحساب كل مصري علشان يروحوا يزيطوا في التلفزيونات والفضائيات يعملوا بلقمتهم،المرسال مكتوب فية اللي جاي:

ياعم سمير هما كلمتين ورد غطاهم  ،موصيكش علي حق مصر صحيح دي كورة بس حق برضك ،سليم والا مش سليم.

أول هام : إوعاك تنسي إن في ولادنا جايين يشجعوا المنتخب أيتها حاجة تحصل لهم أو حد لمس شعره منهم ،إجري علي عمك المراقب قله علي اللي حصل وقلة ماحناش لاعبين غير لما عيالنا يبقوا في أمان ،وإحنا إيش ضمنا إن اللي يحصل لعيل من حدانا برة الملعب يحصل لرجالتنا جواه.

تاني هام: أي حاجة لاقدر الله تحصل جوا الملعب حتي قبل مالماتش يبتدي تسجل عند مراقب الماتش علطول إعتراض وتثبتها عنده وبلاش شغل الهمبكة ده الله يخليك إنت رايح تشتغل وإياك تضيع حقنا زي ماعملت عند بلاد عثمان ورشيدة وتعترض في ساعتها.

تالت هام: بص ياسيد الرجالة لو لاقدر الله خسرنا نتيجة حركات الجزائريين أو بحركة كدة أو كدة مش عارف أفسر إية قدامك ساعة بالكتير بعد المباراة تسجل إحتجاج وبلاش قولة لما نرجع مصر نعملنا ملفين تلاتة نشبرء بيهم علي الكاف ، لا كاف ولا قاف دق علي الحديد وهو سخن ياعترة.

رابع هام: لو إبن أ بو جمال حضر الماتش ده ميلهكش عن حقوق ولاد بلدك وتنشغل في توصيلهم للباب (باب فيلتهم في مصر الجديدة) ومالكش دعوا بيهم هما عارفين الطريق كويس وشوف شغلك انت بس.

أخر هام: ياريت الجدع اللي جايبلك المرسال ده تحلي بقة بشوية (جنبري) من اللي قاعد تلغ فية علي المحيط عندك.

خلاصة القول : إعملك حاجة عدلة.

أخوك

مصري إبن بلد