أحمد فؤاد نجم في حوار خاص ل"بحلقة" : انتو العيال بتوع الإنترنت اللى هتطلعوا عين الحكومه

في إجتماع المجله اللى كان قبل صدور العدد الأول قررنا إن إحنا نلف
فى شوارع القاهرة ندور على عمنا أحمد فؤاد نجم و أول واحد يقابله
يحدد معاه معاد علشان نعمل حوار مع الأب الروحي للمجله و بالفعل قابلت
الفاجومى فى اليوم التضامنى لطلاب معهد السينما مع غزه و حددت
معاه موعد و مكنتش مصدق وانا رايح ان انا هعمل حوار مع الفاجومى

اللى بيمثل لنا رمز لمعانى كتير فهو رمز لانتصار الفكره
على القمع و الرقابه والسجون و هو كمان رمز للابداع الصادق
اللى بيقاوم حتى تغير الزمن فمختلف الأجيال لحد دلوقتى
بتحب تقرا أحمد فؤاد نجم و كمان بتدور على أغانى الشيخ
إمام اللى لحن الكتير من أشعاره و هو كمان رمز للتسامح
فرغم دخوله السجن في فترة حكم الرئيس عبد الناصر
كتب قصيده "زياره لضريح عبد الناصر" اللى أعلن فيها
أن كل الجراح اللى سببتها الام هذه الفتره "طابت" ...

احنا مجله الكترونيه و عايزين نعمل حوار معاك

في البدايه حبيت أعرف عم أحمد بالمجله و احنا مين و بنعمل ايه
و فوجئت بأستقباله الحافل و برد فعله المرحب جدا بفكره الصحافه الالكترونيه
و انه معجب جدا بجيل الشباب اللى بيكتب على الانترنت سواء
على المدونات او الفيس بوك او المجلات الالكترونيه اللى زي حلاتنا
و على رغم من انه لحد دلوقتى فيه كتير من المثقفين و يمكن أجيال أقرب
لجيلنا سناً من جيل الفاجومي بتعتبر ان الصحافه الشعبيه الالكترونيه لعب
عيال انما هو كان بيكشف عن جزء مهم من اسباب حبنا ليه
و هو انه قريب مننا و متابع نشاط الشباب على الانترنت
و مؤمن بنجاحه و ده رغم انه مبيتعاملش مع النت بشكل مباشر
لكن اول كلام هو قاله كان عن رأيه في جيلنا و ده بمجرد ما عرفته
بفكره بحلقة و كان الاتى : " الجيل اللى جاى ده هيعرف ازاى ياخد حقه
و محدش هيقدر عليه لا بوليس و لا مباحث و لا مراقبه و لا اى حاجه
لانه جيل عنده وعى فهم الحدوته أحنا مين و أعدائنا مين و ده ظاهر دلوقتى
بشكل كبير شوف عدد الشباب اللى مهتمين بالسياسه من مختلف الاماكن
و بيشتغلوا في مختلف التخصصات، و خد بالك احنا لسه في أول السكه
شوف قدام هيحصل ايه ، الجيل اللى جاي ده لسه هيبدع أفكار ويكون
تنظيمات تدافع عن حقوقه اللى اتاخدت بالأونطه، الجيل اللى جاي ده
خلاص متنفعش معاه الاونطه و الأيام الجايه هتثبت كده انتو العيال بتوع
الإنترنت اللى هتطلعوا عين الحكومه و الحكومه هتطلع عينكم بس انتوا اللى هتكسبوا فى الاخر"

عن يوم تضامن طلاب معهد السينما مع غزه التاريخ بيعيد نفسه

مقدرتش أبدأ الحوار مع عم أحمد قبل ما أساله عن اللى حصل يوم حفل تضامن طلاب
معهد السينما مع غزة و خصوصا انه كان كاتب في مقاله اليومى في جريده الدستور عن اليوم و قد ايه انه كان فرحان

بطلبه معهد السينما لكن كان فيه جانب تاني لليوم وهو انه انتهى بطرد عميد المعهد للحضور ؟

هو انت فاكر ناس زى دى موجوده علشان تعلم العيال و تسيبلهم حرية الإبداع لا ، ده
علشان يكتموا علي نفسهم و يحطوا قدامهم حواجز و خطوط حمرا ميعدوهاش
و بعدين الحكايه دي بتفكرنى بمره كنت انا و الشيخ امام في كليه هندسه
جامعة عين شمس و كنا بنقول قصيده شقلبان و حد جه قاللى العميد بيقول لكم انتوا عايزين تروحوا علي
البيت و لا علي امن الدوله انا كنت فاكر اللى بيتكلم عميد مباحث و فوجئت بعد كده انه عميد الكليه.

نصر الله ، شافيز ، غزه ، صكوك بيع القطاع العام

معروف انك من محبى حسن نصر الله شوفت ازاى خطاباته الاخيره و الهوجه اللى حصلت حواليها ؟

دى أزمه مفتعله هما بيقولوا نصر الله وحش طيب أوحش من مين لو حد أحسن منه يتكلم و بعدين
هي القضية دلوقتى حسن نصر الله ولا العيال اللى بيموتوا في غزه كل الكلام ده دعايه سياسيه
علشان خاطر يتوهوا الناس و يشوهوا الصوره وبعدين انا نفسي اعرف هو نصر الله قال ايه و فين الاهانه
اللى وجها لمصر هو انت لما ابن عمك يقولك أخوك في حد بيترازل عليه روح ساعده فيها حاجه دي
فيها اى نوع من الاهانه .

حسيت بايه لما فنزويلا طردت السفير الإسرائيلى و ده محصلش في مصر او اى دوله عربيه ؟

حسيت بقوه الفكر و قيمه الحريه و ان الفكره مش بتموت احنا ممكن حد يحاول
يحبطنا و يقولنا ان اليهود معاهم الاعلام الدولى و انهم شاريين عيون العالم بفلوسهم
لكن لا الفلوس متقدرش تموت الافكار ولا الحق، يدفعوا فلوس زي ما هما عايزين
لكن شوف الحقيقه غصب عنهم تعدى المحيط و توصل فنزويلا علشان تثبت ان
الثقافة و الاشعاع الفكرى محدش يقدر عليهم .

بتقول ايه لاى حد يقول احنا عندنا ازمات و مشاكل نشوف حالنا و مالناش دعوى بغزه ولا
حتى اى حد غير نفسنا؟

ما هو ده متخطط ،إن إحنا نبقى غارقانين فى الأزمات و متكتفين علشان منعرفش نبقى أحرار
و لينا كلمتنا و بعدين هو الضرب ده هما قاصدين بيه غزه بس ما هما داخلين بعد كده على مصر
مين قال ان هما هيقفوا عند غزه و بعدين بقى ما تنساش ان غالبا ما بتنتشر اشاعات هدفها
ان احنا نطنش للقضيه الفلسطينيه زى الكذبه الكبيره اللى بتقول ان الفلسطينيين باعوا
أرضهم سنة 1948 و هما لا باعوا ارضهم ولا حاجه وخرجوا من أرضهم بقوه المجازر و السلاح
و بعدين هل معقول شعب بالكامل يبيع بلده .

ما انت عندك اهه عندنا هنا بقالهم كام سنه بيحاولوا يبيعوا فى القطاع العام بس
و مش عارفين يخلصوه يبقي ازاى الشعب الفلسطينى باع أرضه.

بمناسبه بيع القطاع العام عم أحمد فؤاد نجم هياخد الصك بتاع ملكية القطاع العام يعمل بيه ايه؟

ورقه تواليت ، همسح بيه في الحمام ، ما انا نفسي افهم هو ممكن يتعمل بيه ايه تانى ، هو الورقه
دي لو رحت بيها للبقال ممكن تجيب حاجه .

الحريه بين دلوقتى و ايام عبد الناصر

دلوقتى لما اي حد بيقول رأيه سواء كان صحفى او كاتب أو سياسي معارض
قبل ما أى حد من الموالين للحكومه بيرد عليه بيقولوا لو كان الكلام ده ايام
عبد الناصر كان زمانكم في السجن شايف ازاى الحريه بين دلوقتى و عبد الناصر؟

هو السرقه و الفساد ايام عبد الناصر كانت بالشكل اللى بيحصل دلوقتى هما دلوقتى مش من مصلحتهم
يمسكوا حد و يدخلوه السجن هما عندهم سعار أرصدتهم في جنيف و اوربا تزيد معندهمش وقت يمسكوا حد
سايبين اللى يتكلم يتكلم ، و بعدين هو يعنى إيه حريه ؟ الحريه مش بس معناها ان الشعب
يتكلم ، الحريه معناها ان الشعب يملك و يتحكم فى أدوات الإنتاج في البلد علشان
نزرع و نصنع و نعيش حياه كريمه و إن الشعب يملك إتخاذ القرار و يتعلم كويس و يعمل
مؤسسات صحيه و رياضيه كويسه ، الحريه هي كل الحاجات دى مش بس ان الشعب يتكلم
لا الحريه بجد هى ان الشعب يحكم و يتملك و يتخذ القرار

مفيش حاجه اسمها انتخابات فى 2011 الموضوع هيكون خلاف أسري

تتوقع سنه 2011 سنه إنتخابات الرئاسه شكلها هيكون عامل إزاى ؟

انتخابات ايه و فين الانتخابات دى انا شايف الموضوع عباره عن خناقه جوه الأسره
فيه توريث لجمال ولا توريث لحد غير جمال ولا مبارك هيكمل و الكواليس فيها خناقه و هيوقعوا
بعض ان شاء الله و الشعب هو اللى هيكسب بانه بعد ما يوقعوا بعض هو اللى يختار.

لو أفترضنا ان سنه 2011 هيحصل صراع علي السلطه الشعب هيحصله ايه في وسط الصراع ده ؟

ولا حاجه هقولك حاجه في كلمه مشهوره قالها مؤرخ و شاعر اسمه إبن إياس كان موجود
في مصر أيام المماليك بيقول ايه : "و حدثت مقتلة عظيمه بين المماليك البحرية و القبلية
و قتل فيها الف الف نفس "مليون" و لم تنتطح في ذاك شاتان " عادى هو ده حال مصر
يحصل اللى يحصل الحياه بتمشى كوارث الكوارث مبتوقفناش بلاش ابن اياس مش عندك
السادات مات مقتول و الناس عادي كان عندنا عيد قريب باين الناس نزلت أشترت حاجه العيد
الحياه مشيت عادى و هتمشى عادى أحنا مستعدين لاى حاجه .

انت قلت انا متبت في الدنيا و بتلكك و مش ماشى منها غير لما أشوف القضيه الفلسطينيه
بتتحل اللى حاصل في فلسطين دلوقتى بيقول إحنا قربنا ولا بنبعد عن الحل ؟

إحنا بنقرب قوى و الأمل زاد ده العدو إبتدى يفقد توازنه ، هو اللى بتعمله
إسرائيل دلوقتى ده في ناس عاقله تعمله دول مجموعه من المجانين و بيقعوا

طب والإنقسام الفلسطينى ؟

الشعب الفلسطينى ده شعب جبار مبيتلويش دراعه هما عارفين مصلحتهم فين
العالم كله بيضرب فيهم بقالهم ستين سنه عايزين يخلصوا عليهم مش عارفين
مفيش انقسام هيأثر في الفلسطينيين ، شوف المرأة الفلسطينية في أي
حته ، العاقر بتجيب 6 عيال دي اللى مش بتعرف تخلف بتجيب 6، الشعب الفلسطينى
عارف هو بيعمل ايه و هيحرر ارضه ازاى

السؤال الأخير

أخدتنا السياسه و الكلام فيها و بعدنا عن الأدب و الشعر لكن آخر سؤال هيكون
أهم الكتب اللى قريتها قبل ما تكتب شعر و حسيت انها كونت الروح الإبداعيه عندك؟

اهم الحاجات كانت من الكتب التراثيه الصفرا القديمه سيره سيف بن ذي يزن
و الزير سالم و أهمهم سيرة عنتر بن شداد ، ده بقى اول ثائر ضد العبوديه
اشترى حريته بدراعه يمكن عنتر بن شداد يكون رمز عربى مهم اثر فيا
لما تعرف ان كان فيه واحد زى ده و عربي و شاعر و فارس و ثائر على العبوديه من الاف السنين ده
أكيد كان شئ مبهر و عظيم بالنسبه ليا

انت قلت قبل كده برضه ان من اول الحاجات اللى قريتها كان شعر ابن الفارض
بس هو اكيد كان فيه استعداد او قريت حاجات قبل كده علشان خاطر تقدر
توصل لقراءه ابن الفارض الشاعر الصوفى الكبير؟

لا ولا استعداد ولا حاجه مش ابن الفارض ده ابن تسعه و انا ابن تسعه
مفيش حاجه قرايتها صعبه لو بتحب الشعر هتفهم اى شاعر عايز
يقول ايه .

خلصت الأسئله لكن الحوار ان شاء الله مش هيخلص أبدا ً بين المجله و عم أحمد
و من حبنا ليه هنحاول كل شويه نروح و نتلكك و نقعد علشان نقطف شوية بلح
من نخلة البلح الأبريمى اللى واصله للسما، المزروعه على طمي مصر
و شاربه من مية النيل فطرحت الشعر اللى احنا ما بنشبعش من قرايته ولا سماعه،
فى النهاية شكرت عم أحمد على الفرصه الجميله دى و طلبت منه طلبين و هو مشكورا

لباهم الأول كان انه يوقع علي ديوان الأعمال الكامله ليه الصادر عن دار ميرت للنشر

و كتب لى

أحمد حامد

من جيل الشياطين

شدوا حيلكم يا عيال

نجم 10 -1-2009

و هى دي صورة التوقيع

بالإضافه إلى صوره معاه و يمكن الصوره هتوضح انا كنت سعيد قد إيه ان انا عملت حوار مع الفاجومي