لما العروسه تبقي للبيع من حق حماتها تقولها : أدينا يومين نفكر ونرد عليكي

بيني وبينكم كده يا بنات في موضوع مضايقني من فترة بس للأسف أنا اكتشفت أن الموضوع ده مش حالة فردية ده طلع حاله جماعية
وعشان كده هتكلم بحرية ما إحنا طلعنا في الهوا سوا والحمد لله

أنا صحيت فجأة كده بصيت في المرايه لقيت نفسي علي حافة العشرين وما ادراك ما العشرين ده الأيام بتجري جري
(و مامتى صحيت الصبح أول مرة تقولي صباح الخير يا عروسة (لاء بقي ده الموضوع في إن وأخواتها كمان

 ما أنتم عارفين الأمهات المهم شميت ريحة عريس في الموضوع يا فاتح يا عليم يا رزاق يا كريم وكمان هيجي بكره
هو ومامته علشان يعينوا البضاعة فكرت أعمل زى سعاد حسني في الفيلم بس خوفت العريس يجيلة انهيار عصبي وتتقلب من جوازه لجنازة.

وبعد ضغط علي أعصابي وغصب علي نفسي لحد ما بقت مناخيري في قفايا قعدت مع العريس
والأستاذ المبجل ومامته كريمة الشرف والعفاف فصصوني أسئلة أسئلة أسئلة جبتي كام في الثانوية العامة ؟ مش عارفه أشمعنه ؟ 
السؤال ده يمكن مامته هتستلفهم وتخش بيهم كلية الطب.. هواياتك أيه؟ بتعرفي تطبخي ولا لاء لحد ما عرفوا صابع رجلي الصغير مقاسه كام

وبعد كل ده حماتي المصونة قالتلي :  طيب يا بنتي أدينا يومين نفكر ونرد عليكي
طبعا صحبتكم سمعت الكلمة من هنا وشاطت من هنا ولمعرفة اللي حصل للعريس بعد كده أنظروا جريدة الحوادث..

جواز الصالونات موضوع بقي صعب قوي في مجتمعنا رغم التحضر والتقدم والحرية اللي حصلت عليها البنات واللي
.مكنتش موجودة
قبل كده بس للأسف الموضوع ده بقي منتشر قوي وخصوصا بين البنات المحافظات أو اللي بيرفضوا الصحوبية بين البنت
و الولد لكن مش ده موضوعنا الأساسي لأن ده صح وكمان مش هغير نظرتهم المحافظة دي لأي سبب
المشكلة الأساسية الطريقة اللي بيتم بيها التعارف واللي في نظر كتير من الأهالي صح وهي في الحقيقة بتحول البنت
لمجرد سلعة

وتهدر من كرامتها ويمكن تشعرها بالنقص أو تسبب ليها عقدة لو حضرة العريس المحترم معجبتوش البضاعة
طيب ليه منستخدمش طرق أفضل من كده حفاظاً علي كرامة البنت ومتسببش كمان احراج للطرفين..

أن ممكن لو الشخص ده بيتقدم عن طريق حد معرفة الأهل يطلبوا من الشخص المعرفة أنه يعمل عزومة أو حفلة صغيرة 

 لأى سبب بدون علم البنت أن ده عريس ويجمع بين الطرفين ويفتح قدامهم ساحة للحوار والتعارف ولو العريس عجبتة البنت يتقدملها.

وممكن فكرة تانية كمان الأم تاخد بنتها في أي مكان عام زي النادي مثلاً وتتفق مع الشخص اللي عاوز يتقدم ومامتة انهم
يقابلوها ويجي الموضوع كأنه صدفه قدام البنت كأن بين الامهات معرفة سابقة قديمة ويقعدوا مع بعض ويتعرفوا لو في
قبول يتقدم لو مفيش بردو الموضوع خلص من غير إحراج أو مشاكل..

دي فكرة بسيطة ممكن يتبني عليها طرق كتير جدا حسب ظروف كل شخصية
بعيدة عن المشاكل واهدار كرامة البنت والاحساس بأنها مجرد سلعة وكمان بتعزز من شأنها ده بالإضافة إنها تبعد عنها
الاحساس بالنقص إذا العريس عجبها وهي معجبتوش لأن البنت في المواضيع دي بتكون حساسة جداً اكتر
من الولد كمان لأن الولد عموماً لما بيجي يتقدم لأي بنت بيبقى متوقع منها الرفض أو القبول بس صعب قوى يحصل العكس وفى كمان نقطه مهمه قوى فى الموضوع ده الخطوبه القصيره ممكن تبقى مشكله كبيره بعد الجواز لان الخطوبه عموما بتخلى الطرفين يتعرفوا على بعض اكتر و يحددوا اذا كان فى تفاهم وتوافق بينهما ولا لا ،علشان لو فتره الخطوبه قصيره و اكتشفوا بعد الجواز ان الشخصيه دى مش مناسبه او فى عيوب متقدرش تستحملها فتحصل مشاكل ممكن تؤدى فى النهايه للانفصال و اكيد انتم عارفين وضع المطلقات فى مجتمعنا شكله ايه و المجتمع بيبص للمطلقات ازاى كأنهم وصمه عار ، و تفاديا لكل المشاكل اللى ممكن يسببها جواز الصالونات لازم نفكر صح وبالراحه علشان منندمش بعد فوات الاوان..!