من دفتر أحوال مصر..

وبتمشي 2009 وبتيجي 2010 وهنسمع الجمل بتاعة كل سنة يارب السنة دي تكون سعيدة ومتكونش كئيبة ومفيهاش مصايب ونكد زي اللي قبليها وتطلع السنة اللي بعديها ألعن وأنيل من اللي قبليها بنصبر ونسكن انفسنا بكلام معسول والسنة دي سنة كئيبة ومش سعيدة مش تشاؤم ولا تطير بس رؤية للنتايج اللي بتذهب إليها المقدمات ومفيش هابي نيو يير كفاية علينا الطراطير اللي لابسنها والزمامير اللي ماسكنها

السيد صفوت الشريف قالك أمن مصر خط أحمر هو يقصد إن أمن مصر قميص نوم أحمر مش أي حد يقرب منه إكذب زور زيف الحقايق وإقلبها واجعل الظالم مظلوم والمظلوم ظالم فعلا القبيحة تلهيك وتجيب اللي فيها فيـــــــــــــــك

إنما المؤمنون أخوة ربنا قال كدا مش قال انما المصريون اخوة المصريون مؤمنون انما العرب برده مؤمنون ربنا هيحاسبنا على حالة الفرقة التي نعيشها

مينفعش يزيفوا الحقيقة ويقولوا مصر هتحمي نفسها بالجدار الفولاذي هذا الجدار عار وسبة في جبين كل مصري وكأنهم مش بيرحموا ولا يتركوا رحمة ربنا تنزل تسقط كل الحدود بين العرب ويسقط كل من لا يفكر الا في نفسه وستعيش القومية والأمة


عجيب امر عائلة أديب عماد الدين اديب احد أعمدة الحزب الوطني وواحد من دعاة النظام ومعجب بالرئيس أكتر مالرئيس نفسه معجب بنفسه ومدافع دائما وأبدا عن كل ما هو متعلق النظام أما شقيه لا بيعجبه العجب ولا الصيام في رجب بيشتم في كل الناس وكل النظام والريس وابنه اما زوجته فهي مذيعة الحزب الرئيسية في تليفزيون الدولة..

وأحد دعاة الحزب الوطني السؤال ما هو مصدر كل هذا العدد من الملايين اللي بالعبيط والانتاج بسخاء وبذخ على افلام معظمها دون المستوى تصل الي اربعين وخمسين مليون مع العلم انها تحتاج سنين وسنين حتى تعود تلك الايرادات واجور للممثلين تعد رهيبة في السوق السينيمائي ودعاية غير عاقلة بالمرة وتوسع في انشاء دور عرض مبالغ فيه

طمعانجي بناله بيت فلسانجي سكنله فيه يحيي الكومي بيقول انها نصبت عليه وسرقت 100 مليون جنيه لما هو اتنصب عليه في المبلغ دا ولسه عايش أمال هو معاه كام اصلا ؟ والتانية اشترت خمس فيلات تعمل بيهم ايه وهو كان عنده خمس فيلات بينيل فيهم ايه ؟ واتجوزوا كام يوم بالملايين دي كلها ايه الأرف دا وايه كمية الملايين اللي بتتقال دي ؟!


يبدو أن السيد وزير المالية الحالي كان عربجي سابق من يومان في اجتماع مجلس الشعب بخصوص قضية عزبة الهجانة صرح ان المالك الاصلي هيمسكه وهيطلع دين اللي خلفوه ولولا عم احمد عز صاحب الحنطور كان طلع المطوة من البدلة وقلعلهم ملط

بس الراجل مغلطش في تهديده مهو مطلع دين الشعب كله جت على مالكي عقارات عزبة الهجانة!!