علشان تشجعوهم مش لازم تعرفوهم..!

يعنى ايه يعنى عشان هم لعيبة كورة يعنى .. ماينفعش نكلمهم بالطريقة ده ؟؟؟
و لا احنا عشان دائما متعودين على اختلاف المعاملات على حسب انت مين يعنى ؟؟

زى مثلا حد يعاملك وحش و لا مثلا تدخل مكان ويديك سعر اغلى عشان هوا مش عارفك او او او امثلة كتير جدا" و لما يعرف انت مين يقلك معلش ياباشا اصل انا مااعرفش سعاتك .... و حتى معلش اصل ما اعرفش انك انت فلان الفلانى .. معلش العتب على النظر و الكلام ده

ايه يعنى لو دخل لاعب السوبر ماركت عشان يشترى كوكاكولا و ادى الراجل بتاع الكاشير 10 جنيه راح الراجل قاله عايز 10 جنيه غير دى ؟؟؟

ايه يعنى معناها ايه ؟؟؟ ماهى بتحصلنا 10000000 مره و ايه العيب فى كده ، مين ماكان يعنى مش فاهمة

و المشكلة انه الاعلانات ده بتتعرض طوووول الوقت و كذا مره يعنى بينقلنا فكر ان دول آلهة و ماينفعش يتعاملوا زى البنى آدمين العادين ؟؟؟

و أخيرا الاعلان اللى بجد واخد جائزه الهبل و التخلف ،لما لاعب داخل العمارة و البواب بيسأله ( طالع عند مين يا أستاذ ؟؟ يقوله اللاعب عند حسن الدور التانى و عيال البواب تفضل متنحة..

و طبعا" رد فعل اللعيبة فى كل الاعلانات دى انهم يظهروا الحزن من المعاملة السيئة للناس لهم (مع انها و لا معاملة وسيئة و لا حاجة و كل الحاجات اللى طلعت فى الاعلانات ده حاجات طبيعية بتحصل للبشر ) بس احنا بنحب نعمل آلهة و نفرعن الناس

أنا فاهمة ان فكرة الاعلان ان عايز يعرف الناس بالشباب دول و ان احنا لازم نعرفهم لازم نشجعهم طيب مش عشان نعرفهم لازم يعنى نعاملهم معاملة تانية و نبوس الايادى يعنى .....والاعلان ده بيضع افكار فى الناس انك لما تشوف لاعب كرة لازم تعامله بكل احترام و تنحنى و سيبه يقف فى الممنوع و خد اى حاجة منه و ماتقوموش من مكانه و لا يسأل هوا رايح فين و لاجى منين ؟؟؟ عييب انت ماتعرفش هوا مين و لا ايه ؟؟؟؟ يعنى ( تخلف ) و بنتريق على اصحاب المناصب و البهاوات و البشاوات و فلان و علان ، الناس اللى بتعمل الفجوة ده بدايتها من عدم المساواة فى التعامل

على رأى المثل سألوا الفرعون ((يافرعون ايش فرعنك؟؟؟ ... قال مالقتش حد يلمنى )) ماحدش يزعل بقى لما يبقوا فراعنة بجد..!