من يوميات زعيم عربى ثائر

نشجب وندين ونندد

ونعيد ونزيد ونهدد

وف وسط صراخنا العاتى

أنا فارد اهه دراعاتى

وباقولها بكل صراحة

بكلام موزون متحدد

**********

بارفض وباقاوم واضرب

من دم الأعداء هاشرب

وهاقف ع الجبهة واحارب

واضرب فى عدوى مضارب

وف ساعة الجد بقوة

وبكل شجاعة..انا هاهرب

**********

أنا فارس سرقوا حصانى

من تحتى ولفوا موانى

دُرت وراهم ميت مرة

جربت الغربة المرة

دُرت ولفيت الدنيا

علشان اتفرج تانى

**********

ومسكت السيف بإيديا

وبارزت بعزم ما فيا

وقتلت اتنين وتلاتة

وحاربت بكل تباتة

على خبطة ف كتفى من امى

فقت وفتـَّحت عينيا

**********

وقاطعتوا وقلت هاقاطع

وبشكل نهائى وقاطع

بس استثنوا لى البيبسى

والكولا وكيس الشيبسى

والإريال والكنتاكى

غير كدة هابعد وهامانع

**********

وطلعنا عملنا مظاهرة

كات باينة وواضحة وظاهرة

قلنا له يا عم باراك

دى قلوبنا بتترجاك

عايزين عشرين فى المية

وحياة تربتك الطاهرة

**********

وهتفنا هتفنا هتفنا

حددنا خلاص أهدافنا

وطالبنا بكل حقوقنا

أصلنا من مركوا دوقنا

وهناك فى بلاد البورجر

سمعوا جعيرنا وهتافنا

***********

وهناك وف تل أبيبهم

مااعرف إيه اللى عاجبهم

دى حياتهم صعبة وناشفة

ولا مدرسة ولا مستشفى

وولاد بيرَمـُّوا حجارة

على طول شايلينها فى جيبهم

**********

عايشين العيشة المرة

ضربوا ف بعض متين مرة

والدنيا اتقلبت خالص

ودة بيقايض ويخالص

على واحد مات وأظنه

ان اسم أبوه الدرة

**********

ويقولوا خلاص ووافقنا

ولا عمرنا مرة نافقنا

نرجع والفرح مالينا

ونسلم على أهالينا

فجأة وعلى دم ولادنا

تلقانا صحينا وفوقنا

**********

نرجع نصرخ ونمدد

أصواتنا وتانى نشدد

هانحارب..هانحطمكوا

فى محاكم هانلطمكوا

ونعود تانى نكررها

نشجب وندين ونندد