اللي مشفتوش في التليفزيون من حفلة منير وخالد اقراه في بحلقة : في حفله غنائيه بخلفيه كرويه الملك محمد منير والشاب خالد يقدموا مباراه طربية

الساعه 2ونص صباحا انتهت حفلة منير وخالد في اكادمية اخبار اليوم ب 6 اكتوبر اللي شافها ملايين في التليفزيون علي الهوا لكن بحلقه هتحكي تفاصيل مش هتعرفوها الا من بحلقه .
- استعدادات الامن :-
كان معروف من البدايه ان الحفله هيكون فيها اجراءات امنيه مشدده بسبب وجود الجماهير الجزائريه في ظل الاجواء المتوتره بين الجمهورين المصري والجزائري والاجراءات دي بدات قبل الحفله بحوالي 6 ساعات ونص ( تقريبا الساعه 4 ونص ) بدايه من قفل كل الطرق اللي في المنطقه المحيطه بالاكاديميه بشكل جزئي في البدايه وبعد كده قفلها خالص وتواجد اعداد كبيره جدا من عربيات الشرطه والامن المركزي وتواجد كمان مدير امن 6 اكتوبر وعدد من القيادات الامنيه التانيه .
- وصول الجماهير :-
وفي الساعه 6 مساءا اتفتحت الابواب لدخول الجماهير اللي حضروا للحفله علي دفعات مسببتش زحمه كبيره علي الابواب وده خلي الدخول سهل لدرجه كبيره رغم تدقيق الامن في تفتيش كل اللي داخلين بما فيهم المنظمين وفضل وصول الجماهير مستمر لحد الساعه 10 تقريبا ( وده الميعاد اللي اعلنوا ان الحفله هتبدا فيه ) ولما بدات ادراة الحفله في تشغيل مزيكا اتفاعل معاها جزء من الجمهور وجزء تاني كانوا واقفين علي جنب او قعدين علي الارض بعيد عن المسرح اما الاغلبيه فكانوا بيرددوا هتافات بخصوص ماتش مصر والجزائر زي ( ايه اه اه .. ان شاء الله هنكسب ) و ( تا تا تا الجزاير هتشيل تلاته ) وطبعا علم مصر كان في كل مكان .
- فقرة الشاب خالد :-
وقبل الساعه 11 بدقايق بدا المسرح في الاستعداد لاستقبال الشاب خالد اللي المفروض انه هيطلع الاول لوحده وبعد كده يطلع منير ويغنوا سوا شويه وبعد كده يمشي خالد ويكمل منير الحفله للاخر وده زي ما قالولنا بعد ما دخلنا لكن الجماهير المصريه فضلت تهتف لمحمد ابو تريكه نجم منتخب مصر عشان كده طلع منير مع خالد في الاول يقدمه للجماهير وطبعا استقبلوهم استقبال رائع وبعد ما غنوا اغنيه مع بعض نزل منير وساب المسرح للشاب خالد واكتر من مره خلال فقرة خالد كانت الجماهير المصريه بتهتف زي ( المصريين اهم ) فيرد عليهم الجزائريين ( خالد خالد خالد ) ولما اتكرر الهتاف بين الجمهورين طلب الشاب خالد منهم الهدوء وبعد شويه حاول بعض الجماهير المصريه ( ميعدوش العشره ) انهم يحركوا باقي الجماهير للهتاف ضد خالد لكن مافيش حد استجاب ليهم فسكتوا بسرعه وفي اوقات كتير كان المصريين بيشاوروا ليه بالرقم تلاته في اشاره لمباراة مصر والجزائر يوم السبت وفي نهاية الفقره طلع منير تاني وغنوا شويه مع بعض وكان مع الشاب خالد علم مصر حاطه علي كتفه بعدها شكر خالد الجمهور و منير وانصرف مع منير حوالي الساعه 12 ونص بعد ما قدم مجموعه من اغانيه نالت اعجاب كل الحضور رغم الحاجات البسيطه اللي قولناها .
- فقرة منير :-
ولانه الملك وبيربطه حالة عشق مع جمهوره كانت نداءتهم عليه مستمره لمدة ربع ساعه ودي فترة تجهيز المسرح وصعود فرقة منير لحد ما طلع الساعه 1 صباحا وكان استقبال الجمهور ليه استقبال الملوك فعلا وبعد ما قدم اول اغنيه حيا الجمهور وشكر الشاب خالد علي اداءه وشكر الامن عاي المجهود والنظام اللي كان موجود وطول 90 دقيقه هي مدة وجود منير علي المسرح كان تفاعل الجمهور معاه فوق الرائع وطبعا منسيش يطالبهم بالهدوء وعدم التعصب في ماتش السبت وفي الساعه 2 ونص ختم محمد منير الحفله واتمني للجميع انهم يروحوا بالسلامه .
كل اللي كانوا هناك اكدوا ان الحضور كان عالي جدا وفي ناس قالت انه حوالي 50 الف بس الاكيد ان كل الناس اللي جت روحت وهي سعيده اوي باداء منير وخالد ومن اظرف التعليقات اللي سمعتها عن الزحمه لما قال شاب لصحبه انه خايف يجي يهرش احسن يهرش في اللي جنبه .